哭了,真的哭了

今日lunch去左維苑食,叫左野食之後去左新都個toilet,
突然見到媽媽!見到媽咪心情真係好興奮!
amyter都話我表現得有d「細路」!
因為我真係好開心好開心!
再望兩眼,媽咪拎住一個拖地桶,入面有塊布,好多污水!
問媽咪做咩拎住個桶,原來佢要倒水洗布...

當我一直排住隊,一直望住媽咪著住個套黃澄澄制服既背影...
媽咪好矮,連倒水都要企一企高先倒得曬...見到佢好唔願意咁掂個塊污穢不堪既布..
個心真係好痛好痛...眼淚汪汪,照到塊鏡雙眼都紅曬...{依家我都想喊:(}
amyter形容我想喊既時候..個reaction係vigorous嫁:(
當時我心諗,好唔想媽咪做依d粗重野,係我心目中已經係好厭惡既工作!
好想去搶左個桶,好想幫媽媽洗布,真係好唔忍心!
點解媽媽要做依d野?點解我唔可以快d大個可以照顧媽咪?
點解媽咪可以咁偉大為左頭家出番黎做part time?

哭了,真的哭了..好努力咁「吸」番我d眼淚入去..
唔想比媽咪知道我喊,無奈媽咪見到佢個女總好似睇到一切..
「善文妳喊丫?!」「呀唔係..打喊路姐:)」..
蘇善文就係咁..連喊都唔想比父母知!怕你地擔心!怕你地覺得我唔夠strong!
蘇善文就係咁..家庭觀極重!通常我係學校喊都係為左家事..
屋企有事比一切都要緊要!
好記得媽咪仲做緊護士既時候..得小二既我見到媽媽日日番到屋企都喊..
細細個12點幾都唔訓想偷聽媽媽做咩野..係到扮訓覺..
幼稚既我一心諗住打果個醫生個老婆!最後我冇打佢...
只係媽咪辭職既時候,年紀輕輕既我同佢講左一句「妳唔好蝦我媽咪啦!」
小朋友既說話就係咁坦白,依句說話其實都係媽咪話番比我聽..
因為佢聽到之後感動到喊...可能我既家庭觀就係從小開始培養..

我好希望大個有份stable既職業去比我好好供養父母..
等我依個做女既做番我應做既事!