足球場後有感__*

岩岩同爸爸去左一個離家不遠既足球場做運動,
我當然唔係去踢波啦!而係去跑跑步!
而爸爸亦好興高彩烈咁係屋企搵番果個「久違」了既足球出黎,
睇下有冇得踢下波!

去到足球場,哈,又見到大腳!
丫!我都冇同大家提過我同大腳點「相識」既!
大腳我諗係一個大我小小既「波友」,{其實我都唔知點解踢波個d男仔個名咁行-,-}
前排我咪話要減下肥既!
所以近黎成日都會自己一個落依個足球場係旁邊跑下步,
第一次去到,的確好熱鬧!
跑跑下大腳一個「大腳」成個波飛埋黎,
我成個人仆低左,於是佢當然要行埋黎睇下我有冇事啦!
仲請左我飲左包檸檬茶,我見佢都唔係個d「講粗口比講中文仲叻」既男生,
就姑且同佢交左個朋友,
從此以後,我成日落去跑下步,佢都會叫我做「檸檬茶」,
我又會客氣地叫佢一聲「大腳」
{請唔好誤會,我同依位大腳男生只係泛泛之交罷了!}

同大腳「建立關係」,就可以令爸爸都一齊踢波,
我係場邊一路跑跑跑,留意到好多野!
爸爸係依個足球場入面最老既一個,我聽到d波友都要叫佢一聲「呀叔」
{其實係我心目中爸爸唔係好老嫁炸!唔好叫佢做呀叔!}
個d同我差唔多大既男仔,個個都著曬波衫波褲波鞋波襪,
個個都好有動力去跑去踢,唔會留力,
或者依d係我地所講既「青春無限」{唔係貼紙相唔該-,-..}
我既爸爸,就快50歲,都踢到兩腳,
但係佢總會係場上慢慢黎,睇準時機有波到腳先要「博命」
爸爸,你咁大個肚就唔好學人博命啦!
望住爸爸既影子,就好似見到佢成日同我講既野..
「十幾年前,你老豆我係長沙灣同d靚仔踢波踢大嫁!都唔知係個球場留左幾多條腳毛丫!」
見到爸爸「一轉身射左3分波」{唔係NBA嫁咩!?是旦啦!},我當然唔係「哎呀」啦,
而係會心一笑!

場邊除左有我依個「小豆釘」係到跑步,仲有一個老伯,
依個老伯都幾可憐,一個老伯伯著住單薄既衫拎住罐啤酒坐係場邊睇波,
我仲諗,點解佢冇親人陪佢既?!
見到老伯伯好專心咁樣睇波,我心諗..
依位伯伯後生既時候都一定好似大腳咁樣踢波踢大,
所以佢先咁著迷於足球,
唔知爸爸老左會唔會好似依個伯伯咁呢,
不過我可以好確定爸爸你一定唔會自己一個,
我同媽媽一定會陪係你身邊!

除此之外,場邊亦有一d比我更「豆釘」既「小小豆釘」係到玩個「膠波」
佢地踢緊既係一d好細個比細路哥玩既足球,難登大堂!
睇大中細腳佢地{佢地真係叫大中細腳-,-}咁衰亦一定唔會同依d「小小豆釘」玩啦!
但係,依d小朋友好天真無邪,
冇錯!係冇人同佢地踢!
但係佢地拎住個膠波就會好開心咁對住個場邊踢踢踢,
等個波彈番黎比佢地又踢踢踢,
等佢地大個仔,其實依個足球場咪又係佢地既世界!

10年後既佢地會點?
小小豆釘就會變左大腳,踢波踢親人{我係咁小氣嫁啦-,-!}
大腳就變左我爸爸一樣,應該已為人父吧!
爸爸就會好似個老伯伯一樣係場外睇波!
我?!依家我都唔知...

不經不覺,我已經跑左個幾鐘,
5:45pm - 7:00pm
同大腳講聲再見,叫佢踢少d波!哈!
同爸爸盡興而歸!下次再一齊去做運動!